حبيبك سابك

عشانها .. حبِيبِك سابِك ... دوقتى عذابِك

سهرتى بتبكى طول لياليكى .. غرقانة فى الدموع عينيكى .. و كل الناس حواليكى .. بيلوموكى و مش حاسين بيكى

حتى أهلِك و صحابِك .

و انتى قلبِك محروق

تايه ف حيرة ، و افكار كتيرة

مش عارفة الغروب م الشروق

عملتى إيه ؟ ... يسيبِك إزاى و ليه ؟

مفيش ما بينك و بينها فروق

و اللى مزوِّد آهاتِك ، إن انتى بتحبيه .. بجد دايبة فيه .. محتاجة ليه .. و مش عارفة قُصاد ده كله تعملى إيه ؟ .. تدوسى على قلبِك و تسيبيه .. و للا من تانى تجيبيه .. و للا تحاولى تنتقمى منه و تعذبيه ؟؟ .. و إزاى ده كله تعمليه ، و انتى لسه مشتاقة ليه

و هايجننك الشوق ؟؟

ما بين كرامتِك ، و أوجاع هزيمتِك ، .. و الندم
حاسة بحلمِك إتهدم
عايشة صحيح .. لكن حياتِك زى العدم

بجد محتارة ، مكسورة منهارة ، حاسة جوه منِك بالمرارة ، حاسة روحك جوه حارة

بيبانها سد
ليلها غميق ، لا حد شايفك و لا شايفة حد ، و لا فيه إيدين بتتمد ، كل شوارعها ضيقة ، و شكل بعض
مش فارقة تروحى لفين ..... و كل السكك .. أخرتها

خســـــــارة .